គ្រប់មុខជំនួញទាំងអស់ គឺសុទ្ធតែត្រូវការអ្នកគ្រប់គ្រងដែលប្រកបដោយគុណសម្បត្ដិល្អ និងអាចកាន់ចង្កូតសម្រាប់មុខជំនួញពួកគេបាន។
អ្នកគ្រប់គ្រងល្អ គឺអាចធ្វើឲ្យជំនួញដំណើរការទៅមុខបានដោយរលូន។ សារៈសំខាន់ក្នុងការគ្រប់គ្រងប្រកបដោយគុណភាព គឺការគ្រប់គ្រងបុគ្គលិកក្នុងក្រុមហ៊ុន ឬក៏អង្គការឲ្យបានល្អ និងធ្វើការសម្របសម្រួលរាល់សកម្មភាពទាំងអស់ដើម្បីឆ្ពោះទៅកាន់គោលដៅរបស់ផ្នែកនីមួយៗ ក៏ដូចជាអង្គភាពទាំងមូល។ អ្នកគ្រប់គ្រងដែលមានគុណសម្បត្ដិល្អ គឺត្រូវ ៖
១. ទំនាក់ទំនង
គ្រប់ជំនូញដែលទទួលបានភាពជោគជ័យទាំងអស់ គឺសទ្ធសឹងតែកើតចេញពីការសហការល្អជាមួយអ្នកគ្រប់គ្រង និងសមាជិកក្នុងក្រុម។ ប្រសិទ្ធភាពនៃទំនាក់ទំនង គឺអាចផ្ដល់ឲ្យនូវភាពជោគជ័យនៃគោលដៅដែលបានកំណត់។ គន្លឹះដ៏សំខាន់ក្នុងការរក្សាទំនាក់ទំនងល្អជាមួយអ្នកដទៃ គឺការជំរុញទឹកចិត្ដ និងការយកចិត្តទុកដាក់ពីពួកគេ និងគ្រួសាររបស់គេ។
២. ចំណេះដឹង
ក្នុងនាមជាអ្នកគ្រប់គ្រងម្នាក់ អ្នកត្រូវមានការប្រឹងប្រែងបន្ថែមសម្រាប់មុខជំនួញរបស់អ្នក។ អ្នកត្រូវមានចំណេះដឹងក្នុងការស្វែងរកពត៏មានសំខាន់ៗដែលមានប្រយោជន៍សម្រាប់ជំនួញរបស់អ្នក និងអ្វីៗដែលកំពុងកើតឡើងនៅក្នុងទីផ្សារ ក៏ដូចជាការប្រកួតប្រជែងក្នុងមុខជំនួញរបស់យើងផងដែរ។ អ្នកនឹងមិនមានចំណេះដឹងគ្រប់គ្រាន់ទេ ប្រសិនជាអ្នកមិនបានដឹងពីសកម្មភាព និងការផ្សព្វផ្សាយរបស់ដៃគូប្រកួតប្រជែងរបស់អ្នក។ ចំណេះដឹងក្នុងមុខជំនួញរបស់អ្នក គឺអាចជួយអ្នកក្នុងការសម្រាចចិត្តផ្សេងៗ ក៏ដូចជាវិធីសាស្រ្ដក្នុងការដណ្ដើមយកទីផ្សារ។
៣. គ្រប់គ្រងបុគ្គលិក
ការគ្រប់គ្រង ឬក៏ការកាន់កាប់បុគ្គលិក គឺមានសារៈសំខាន់សម្រាប់អ្នកគ្រប់គ្រងគ្រប់រូប។ អ្នកដឹកនាំត្រូវចេះសួរនាំពីបុគ្គលិក និងធ្វើការពិភាក្សា ក៏ដូចជាផ្ដល់ និងទទួលយោបល់ពីបុគ្គលិក។ អ្នកមិនត្រូវចេះតែគ្រប់គ្រងបុគ្គលិក ដោយមិនដឹងអ្វីសោះពីពួកគេនោះទេ។
៤. មានភាពជឿជាក់
អ្នកត្រូវមានភាពស្មោះត្រង់ជាមួយខ្លួនឯង និងបុគ្គលិក។ នៅពេលដែលអ្នកមានភាពស្មោះត្រង់ អ្នកដទៃនឹងមានភាពជឿជាក់លើអ្នក។ អ្នកត្រូវឲ្យពួកគេមានភាពជឿជាក់ថា អ្នកមានភាពយុត្ដិធម៏ និងមិនលំអៀងឡើយ។ អ្នកត្រូវមានការអត់ធ្មត់ក្នុងការស្ដាប់ពីការរអូរទាំរបស់បុគ្គលិក និងការរឹះគន់របស់ពួកគេ។
៥. ការបែងចែកសិទ្ធ
ក្នុងនាមអ្នកជាអ្នកដឹកនាំ គឺអ្នកមានសិទ្ធក្នុងការធ្វើការសម្រេចចិត្ដក្នុងការធ្វើអ្វីមួយ។ ហេតុនេះ អ្នកត្រូវបែងចែកសិទ្ធនេះឲ្យអ្នកដទៃខ្លះ ដើម្បីឲ្យពួកគេជួយចែករំលែកពីគំនិតយោបល់ក្នុងការសម្រេចចិត្ដ៕
បានដកស្រង់ចេញពីៈ http://success.com.kh/?p=3401
